لقاء السياسي/محمد مومن
صرح وزير الصناعة والتجارة السيد رياض مزور اليوم الأربعاء فمراكش، أن المغرب دار قفزة كبيرة فمجال صناعة الطيران والدفاع.
مزور اللي كان كيهضر فافتتاح معرض مراكش الدولي للطيران فالدورة الثامنة ديالو، قال بالحرف أن المنصة الصناعية اللي ما كانتش كاع قبل 20 عام، اليوم ولات قادرة تصاوب أعقد الأنظمة، وهادشي كامل بفضل الرؤية ديال سيدنا الله ينصرو.
وأكد الوزير أن الطلب العالمي كبير بزاف هاد الأيام على المنتوجات المدنية والعسكرية، والمغرب واجد باش يرفع الإنتاج ويسلم فالوقت وبالجودة المطلوبة.
والنقطة المهمة اللي قال هي أن المغرب ما بقاش غير كيصنع، بل ولى حتى كيصمم الأنظمة، وهادي قفزة كبيرة.
وقال للمستثمرين الأجانب: المغرب ماشي غير بلد سياحي، راه بلد ديال الكفاءات والإنجاز والتنافسية، ومرحبا بكم ديرو شراكات هنا.
للتذكير فالمعرض منظم من طرف جمعية معارض الفضاء والطيران والدفاع، بشراكة مع وزارات الصناعة والنقل والدفاع الوطني والقوات المسلحة والدرك، وغادي يستمر حتى لـ 10 أكتوبر، فيه عروض جوية وطائرات جديدة وندوات على السيادة الصناعية.

